英文版本 / English Version
隨著西班牙於小組出局, 2014年的世界盃對於我來說就變得沒有太大意義。決賽亦如我所料, 一定有德國份 (不是我馬後炮, 我始終覺得如果12年歐國盃四強賽是西班牙vs德國的話, 西班牙應該贏唔到德國入決賽的), 只是我諗都無諗過另一個席位居然是阿根廷啫。再說, 這兩隊波我都沒有偏好, 不過既然這兩年美斯咁無體育精神, 我都唔太支持俾機會佢登基。結果, 美斯得不到佢想要的, 而德國就成為2014的世界盃冠軍. Herzlichen Glückwunsch Deutschland!!!
儘管西班牙的出局傷透我心, 我卻見證到很多大冷門的不俗表現, 很多還帶有驚喜, 不枉我這個月睇波睇到通宵撻旦。以下就是今屆我最欣賞的十個國家隊: (排名有分先後)
10) 阿爾及尼亞
分組賽時的我對阿爾及尼亞極度反感, 因為我不喜歡防守足球, 他們更是打10-0-0, 攻都唔攻的那種。第一場對比利時, 若不是維頓漢傻仔, 我估佢地都唔博到12碼, 好彩佢地堅持唔攻, 最後先可以俾比利時反勝。雖然佢地打10-0-0乞人憎, 但正因為呢種保守的打法足以令德國頭痛, 最後雙方於十六強的賽事更打到入加時。縱使最終以2:1輸俾德國, 但臨尾肯入返粒都算壞唔晒。
美國因為有奇連士文做領隊, 所以有德國二隊之稱。小組賽時的成績算不俗, 雖然與葡萄牙打和, 最後卻以小組第二名出線。不過入到十六強奇哥就用錯戰術了, 諗住對比利時打穩守突擊, 完全無進攻的意慾, 最尾加時入一粒都追唔返, 結果2:1俾比利時撃敗。然而, 當晚龍門侯活成為了全隊的救世主, 這場對比利時比賽佢總共有15次的救門, 如果唔係, 美國應該會輸得更可憐......
8) 波斯尼亞
第一場分組賽輸球own goal俾阿根廷真係唔抵, 但其實之後都無散仲keep到節奏已經算係咁。第二場對尼日尼亞就係最最最唔抵亦令佢地出局的一場, 原因是迪斯高的入球誤判成越位, 之後尼日尼亞球員犯規無被吹停再入埋波, 三個字 - 黑哨! 不過波斯尼亞最令人驚喜是他們中場的傳波不錯, 最遺憾是前場組織較差, 做唔到攻勢, 面對一些防守球隊亦難以埋門, 無乜威脅。
7) 比利時
被視為今屆世界盃黑馬的比利時, 果然不負眾望, 成功打到入八強。他們條籤固然是抽得靚, 可惜, 小組賽時他們的表現都幾嚇人。由第一場對阿爾及尼亞死守, 教練韋莫斯堅持打地波打小組, 最後需要換入費蘭尼打高波先可以反勝; 到第二場對俄羅斯, 又係攻極都攻唔入, 要到最尾80幾分鐘靠夏薩特的個人突破先贏到。儘管比利時星光熠熠, 球員的狀態卻起伏不停。八強對阿根廷一役中, 夏薩特的隱形、迪布尼的大力傳送、維素爾的下下斷纜都是致命的原因, 如果一早決定打高波, 比利時應該唔會輸俾阿根廷囉! 最值得讚揚的是隊長甘賓尼, 要不是他, 希古因射多幾粒應該不是夢。
6) 智利
坦白說, 其實從上屆世界盃, 我已很喜歡智利, 因為他們踢法很傳統的南美, 打得快, 又重攻門, 睇得我好過癮 (再睇睇今屆阿根廷的5-3-2真的想嘔)。四年後的智利好似比上一屆更強, 球員的技術都成熟了不少。再加上踢法跟巴塞不同, 山齊士在更多的空位下踢得仲好, 所以今屆入到十六強真係無庸置疑。不過最後以十二碼輸俾巴西就真的唔好彩, 如果計整體表現, 智利反而值得入八強, 而不是巴西呢!
5) 墨西哥
對上一次睇墨西哥比賽, 是在兩年前的奧運決賽。雖說奧運派出的隊員良莠不齊, 但他們的踢法積極, 最後還奪得金牌, 的確令人留下深刻的印象。今屆墨西哥的表現仍然令我眼前一亮, 先不說第一場小組賽對喀麥隆的兩球越位誤判, 第二場對巴西的拉鋸戰也精彩絕倫, 而第三場對克羅地亞就非常熱血。可惜十六強對荷蘭一役中教練用錯戰術, 領先一球的優勢下都決定死守, 最後就俾荷蘭反cup成功。除了教練出錯, 他們亦敗給cooling break, 荷蘭教練雲高爾得以更改戰術, 最後入多兩粒反勝。此外, 墨西哥亦於今屆出了個神龍奧祖亞, 因為他的神救, 我才會在深夜時份驚叫了很多晚呢!
4) 法國
自從施丹退休, 法國好似跌進一個青黃不接的無底洞。若不是他們於12年歐國盃和世界盃外圍賽與西班牙同組, 我都不會主動去睇他們的比賽。今屆我都對他們抱著一個頂龍十六強止步的心態, 然而, 看過他們第一場贏洪都拉斯3:0, 再5:2大勝瑞士, 每一球都好似對著我塊面黎打一樣, 叫我唔好再睇小他們。的確, 他們今年沒有選入拿斯尼和有傷在身的列貝尼, 踢出來的表現更直接和順暢, 應該被打不只我一個, 還有他們兩個吧! (拿斯尼的女友在23人名單公怖後, 就在Twitter不停攻擊教練迪甘斯選人錯誤, 又在法國出局後出口揶揄, 博出位到難以言喻, 真想跟她說一句: 法國就係因為無左你個垃圾男朋友先去到八強囉!) 儘管法國最終都敗給德國, 但他們可以放眼將來, 因為他們的球員太年輕了, 待四年後大家的表現更成熟時, 應該可以殺入四強的。
3) 哥斯達黎加
要數今屆最強的黑馬, 一定非哥斯達黎加莫屬, 事關他們竟然能夠在死亡D組以小組第一名出線, 成功撃敗意大利、烏拉圭和英格蘭三個足球強國。無他的, 他們的防守的確做到滴水不漏, 前鋒祖爾甘保和拜恩雷斯的表現亦非常出色。只可惜入到十六強賽就要和希臘老鼠拉龜, 最後要靠十二碼取勝, 當然龍門K.拿華斯功不可沒。入到八強的防守依然強橫, 成功裝荷蘭到越位有30幾次之多。可惜他們打10-0-0, 完全沒有攻門之下又要進入十二碼定勝負, 加上雲高爾玩心理戰, 十二碼時換龍門, 最後得不到幸運之神的眷顧, 八強止步, 可謂超額完成。
由於法卡奧的缺陣, 賽前的哥倫比亞都不被看好。坦白說, 他們在分組賽的比賽我都是hea睇, 沒有太上心去看, 畢竟他們的對手有夠沉悶。不過沒有法卡奧, 他們的踢法變得更順暢, 雙前鋒都能夠做到不錯的攻勢。當然, 時勢造英雄, 占美洛迪古斯就成為了今屆世界盃的超新星, 除了入得一球世界波, 還以六個入球成為金靴獎得主! 如果八強賽中沒有被巴西的快節奏影響, 打入四強的應該會是哥倫比亞。那麼巴西就不會食七個一皮, 四強又會更加精彩, 簡直是雙贏呀!
1) 荷蘭
自從12年歐國盃荷蘭的表現就如一坨糞便, 加上入選的23人當中有一半後防球員的知名度不大, 又再因為史奈達的老化, 在分組賽開始之前, 荷蘭都是被低估的一隊。不過, 第一場5:1大勝西班牙之後, 荷蘭可謂如魚得水, 加上運氣加持, 成功殺入四強。當中最具爭議性的一場肯定是八強對哥斯達黎加的十二碼換龍門之舉, 正選龍門施利臣被換出, 換入後備龍門告魯爾去撲救十二碼, 結果取得成功, 雲高爾更因此被捧為神級換人。到四強賽, 阿根廷和荷蘭兩隊的踢法變得更保守, 加時到最後又要進入互射十二碼分勝負。然而, 今次荷蘭換人名單已用盡, 最後華亞同史奈達射唔入, 施利臣一球都撲唔到, 荷蘭宣告無緣世界盃決賽。其實, 我對雲高爾的換人好反感, 因為可憐的施利臣和告魯爾都被他玩弄於股掌之中, 得不到教練的信任之餘, 同時又不能與他開拖。施利臣在記者會上被問及事前是否知道教練的換人安排, 他說完全不知道。記者再問他是否為此而感到不滿, 他還要顧存大局說尊重教練的安排, 其實他心裏滿是粗口又有誰知呢? 到荷蘭輸俾阿根廷時, 雲高爾還要贈慶多一句「如果可以, 我都想換入告魯爾」。頂你個肺, 輸波輸到咁唔要面, 竟然將責任推落施利臣身上, 你點做教練架? 要不是施利臣守了120分鐘, 荷蘭可以打到入十二碼嗎? 其實, 我講咁多, 都是因為施利臣真係好靚仔。
 |
| 迷死人的單眼 |
0 comments:
Post a Comment